Nakaabot na sa 80 porsyento ang nahuman sa negosasyon tali sa mga nasud sa Southeast Asia ug China kabahin sa gisugyot nga Code of Conduct (COC) sa West Philippine Sea, pipila na lang ka adlaw sa wala pa ang ASEAN Summit.
Gipahibalo ni Department of Foreign Affairs (DFA) Secretary Ma. Theresa Lazaro nga nakatampo ang pagpangulo sa Pilipinas isip ASEAN Chair sa pagpadali sa pagkompleto sa maong dokumento.
Sumala kang Lazaro, nahuman na ang kadaghanan sa mga probisyon ug sulod sa dokumento, apan aduna pa’y pipila ka mga bahin nga nagkinahanglan og dugang nga panaghisgot ug refinement.
Magpagawas ang DFA og dugang nga pahayag sa umaabot nga mga adlaw kabahin sa kahimtang sa negosasyon.
Gitumong ang COC nga maglatid og mga lagda ug mekanismo aron malikayan ang tensiyon, panagbangi ug mga insidente sa South China Sea, lakip ang mga posibleng sitwasyon nga mahimong mag-apekto sa mga kaalyado sa Pilipinas sama sa Estados Unidos.
Una nang nagpahayag ang Malacañang sa paglaom nga mahuman ug mapirmahan ang COC sa dili pa matapos ang pagpangulo sa Pilipinas sa ASEAN.
