-- ADVERTISEMENT --

Gipadayag ni Acting Davao City Mayor Sebastian Duterte, ang iyahang opisyal nga pamahayag kalabot sa pagpahunong sumala pa sa konstruksyon sa Samal-Davao Bridge pinaagi sa Writ of Kalikasan nga gi-isyu sa Supreme Court.

Girespeto matud pa sa mayor ang desisyon sa Korte Suprema ug mipahayag nga mosunod sila sa legal nga proseso, ilabina sa ilang pagtahod sa rule of law ug sa katungod sa tanang Pilipino sa usa ka himsog ug balanse nga kalikupan.

Apan gitataw ni Duterte nga ang maong tulay gituyo aron makahatag og mas paspas, luwas, ug mas abot-kaya nga transportasyon sa mga taga-Davao ug taga Samal Island.

Gilauman sa proyekto ang pagpakunhod sa gasto sa biyahe, pagsaka sa turismo ug kalihokan sa negosyo, ug paghatag og daghang trabaho sa lokal nga komunidad.

Gipadayag sa mayor ang kasubo nga human sa daghang dekada nga paghulat, karon kini nadugay tungod sa mga oposisyon nga naggikan sa pipila ka mga grupo nga mas gipaboran ang ilang komersyal nga interes inay sa katuyuan sa proyekto nga makaayo sa kadaghanan.

-- ADVERTISEMENT --

Gisuportahan ni Duterte ang sustainable development ug responsable nga pagdumala sa kinaiyahan, ug gibutyag nga ang tulay misubay sa mga proseso sa environmental assessment ug mitigasyon sa epekto.

Gihagit sab sa mayor ang tanan nga mga stakeholders nga lantawon ang mas lapad nga epekto niini sa rehiyon ug sa matag adlaw nga panginabuhi sa katawhan, ilabina kadtong anaa sa kahimtang sa kalisod.

Gipadayag sa mayor ang determinasyon nga ipadayon ang proyekto, nga mahimong usa ka simbolo sa malinawong panaghiusa tali sa kalamboan ug pagpanalipod sa kinaiyahan.