Nadakpan ang usa ka Chinese national ug duha niini ka mga kaubanan atol sa gilusad nga buybust operation sa pagpanguna sa Criminal Investigation and Detection Group (CIDG) ilawom sa’Oplan Megashopper’.
Ang nasampit nga operasyon ang gipahigayon sa Sampaguita Street, Juna Subdivision, Matina, dakbayan sa Davao, pasado alas 4:00 sa hapon, kagahpong adlawa.
Giila sa mga otoridad ang mga dinakpan nga sila alyas Tee, 56 anyos, usa ka Chinese National nga residente sa Valencia Bukidnon; alyas Jahid, 46 anyos, ug alyas Aisal, 29 anyos nga susamang residente sa Isla Verde, Brgy.23-C ning dakbayan sa Davao.
Nakumpiska sa mga nahisgutan ang 11 ka mga master cases sa duha ka brand sa sigarilyo sulod sa usa ka puti nga Minivan. Sa kinatibuk-an mokabat sa 435,000.00 ang kantidad sa mga palusot nga sigarilyo.
Gikustudiya na karon ang tulo ka mga dinakpan ug pasakahan kini og kaso nga pagsupak sa R.A. 10643.
