Aprubado na ang usa ka ordinansa nga maghatag og kahigayunan sa mga edaran nga makatrabaho sa mga fast food chain ning dakbayan sa Davao.
Subay sa gi-aprubahan nga resolusyon sa konseho ning syudad, diin nakalusot na kini sa ikatulo og katapusang pagbasa kagahapong adlawa atol sa regular session sa city council ang Senior Citizens Work Opportunity Ordinance.
Nasayran nga adunay gipirmahan na nga Memorandum of Agreement ang duha ka mga dagkong kompanya sa fastfood chain tali sa lokal nga panggamhanan sa dakbayan sa Davao.
Kung hingpit na nga mapatuman ang maong balaudnon, mamahimo na nga makatrabaho ang nag-edad og 60-anyos pataas nga dili molapas sa Upat ka oras.
Nasayran nga sa maong balaudnon, makabenepisyo usab niini ang mga adunay kabilinggan sa kaugalingon kon PWD’s nga kwalipikado sa pagtrabaho.
Kini nga balaudnon lauman nga mapatuman dinhi sa syudad alang sa kaayuhan sa mga senior citizen nga aduna pa’y katakos sa pagtrabaho taliwala sa ilahang pangidaron nga nagpabilin gihapon nga produktibo.
Sa pagkakaron, ginahulat na lamang ang pagpirma sa Mayor sa dakbayan alang sa katumanan sa maong balaudnon.
