Mokabat sa 7,000 ka kilo nga frozen whole steamed Saba o Cardava banana gikan sa Davao Region ang unang shipment nga padulong sa Australia.Gisuportahan sa Department of Agriculture-Davao Region o DA-11 ang maong inisyatiba, diin giproseso sa Golden Flavours ang mga Saba alang sa shipment.
Gigamit ang mga saging nga anaa sa 90 hangtod 100 porsyento nga kahinog ug gi-blast freeze sa -18 degrees Celsius, nga mahimong makatabang aron molungtad ang produkto og hangtod usa ka tuig.Gikatakdang molarga ang shipment sa Septiyembre 27 ug gilauman nga moabot sa Australia sa Nobyembre 3, 2026.
Sumala sa DA-11 Agribusiness and Marketing Assistance Division o AMAD, nakuha ang maong oportunidad pinaagi sa mga koneksyon nga natukod atol sa SIE Sabbah International Expo 2026. Gibutyag ni Mindanao Development Authority Assistant Secretary Romeo Montenegro nga nagpakita ang maong shipment sa potensyal sa agrikultura sa Mindanao nga makasulod sa mas dagkong merkado sa gawas sa nasod.
Dugang pa niya, naghatag usab kini og direktang koneksyon tali sa gagmay’ng mag-uuma ug Indigenous Peoples nga nagpatubo sa Saba ug sa mga high-value market sama sa Australia. Gilauman nga ang maong unang shipment mahimong dugang nga oportunidad aron mapalapad ang merkado sa mga produktong pang-agrikultura sa Davao Region ug mapalambo ang access sa mga mag-uuma ngadto sa internasyonal nga merkado.
Sa pagkakaron, giandam na ang 7,000 ka kilo nga shipment alang sa gitakdang pagbiyahe niini ngadto sa Australia karong Septiyembre 27.
