Gisaulog ang usa ka makatandog-kasingkasing nga selebrasyon sa kalinaw ug kabag-ohan nga gihimo sa Mt. Apo Agri-Ecotourism National Park sa Barangay Kapatagan, Digos City niadtong Mayo 24, 2025. Gipasiugdahan kini sa Davao del Sur Police Provincial Office (DSPPO) ubos sa liderato ni PCOL Leo T. Ajero, isip pagtimaan sa ikatulo ka anibersaryo sa deklarasyon sa Davao del Sur nga insurgency-free nga probinsya. Gipasiugda niini ang “Kasalan ng Friend Rescued (FR)”, usa ka mass wedding alang sa upat ka pares nga kanhi mga rebelde nga karon kabahin na sa komunidad.
Ang seremonya gipangulohan ni Pastor Erick Arsaga, Provincial Chaplain, diin gipatuman ang tradisyonal nga kasal nga adunay prosisyon, panumpaay sa mga saad, sininati sa singsing, pagpasiga sa kandila, ug seremonyas sa belo ug pisi. Gipadungagan pa kini sa pag-hiwa sa wedding cake, wine parade, ug pagpanghatag og mga regalo ug souvenir sa mga bag-ong minyo. Gani, ang kasal gawas sa paghiusa sa duha ka kasingkasing, simbolo usab kini sa ilang pagpanumbalik sa normal nga kinabuhi nga puno sa paglaum ug kalinaw.
Sa mensahe ni Atty. Herbert Gonzales, Provincial Administrator, gidayeg niya ang kaisog sa mga Former Rebels (FR’s) couples sa ilang pagdesisyon nga mobiya sa kasamok ug mosalig sa panaghiusa. Nitambong usab sa maong kalihokan ang mga opisyal sa lokal nga kagamhanan, representante sa DILG, PSWDO, Philippine Army 39IB, ug mga kauban sa PTF-ELCAC ug R-PSB program. Nalambigit kini sa paningkamot sa gobyerno nga magpadayon ang kalinaw ug kahapsay pinaagi sa suporta sa mga kanhing rebelde aron sa tibuok probinsya, makab-ut ang tinuod nga kalamboan.
