Nakahatod ug kabalaka sa mga crew sa eroplano ang usa ka insidente sa usa ka flight nga adunay sakay nga 199 ka pasahero ug unom ka crew members gumikan sa talagsaon nga panghitabo samtang anaa kini sa kawanagan.
Sumala pa sa report, gikan ang maong flight sa Frankfurt, Germany ug paingon unta sa Seville, Spain.
Sumala sa Civil Aviation Accident and Incident Investigation Commission sa Spain, mibiyá ang kapitan sa cockpit aron moadto sa lavatory ug iyang temporaryong gibyaan ang kaubang piloto.
Apan, sa wala masayri nga hinungdan, kalit lamang nga nawad-an og panimuot ang co-pilot samtang wala pa nakabalik ang kapitan.
Base sa report sa komisyon, nadungog sa cockpit voice recorder ang mga tingog nga nagsugod sa dihang kalit lamang nga nakuyapan ang co-pilot sulod sa cockpit.
Gisuwayan pa sa air traffic controller nga makakontak sa co-pilot tulo ka higayon, apan wala gayuy nitubag.
Pagbalik sa kapitan gikan sa banyo, gisulayan niini nga abrihan ang purtahan sa lima ka higayon sa cockpit gamit ang standard code, pan wala kini naabri.
Bisan pa sa pagbutang og intercom call sa flight deck sa usa sa mga crew member, gi-deny gihapon ang access.
Tungod niini, napugos ang kapitan sa paggamit sa emergency code aron makasulod og usab sa cockpit.
Sumala pa sa report sa komisyon, dali usab nga gihatagan og first aid ang co-pilot pinaagi sa tabang sa crew ug sa usa ka doktor nga sakay usab sa maong biyahe.
Ang eroplano misulod sa kahanginan og kapin napulo ka minutos nga walay aktibong piloto, apan swerte na lamang nga walay kadaot nga nahitabo. Gumikan sa maong panghitabo gi-divert ang eroplano ug gipalanding kini sa lain nga lugar aron madala gilayon sa ospital ang co-pilot.
Sa medical examination nga gihimo sa doktor, nasayran nga ang co-pilot nawad-an og consciousness tungod sa usa ka preexisting neurological condition nga wala siya kahibalo, ilabi na nga wala kini makit-i sa iyang aeronautical medical examination.
Human sa maong insidente, gisuspende temporaryo ang iyang medical certificate.
Nagpasalig usab ang airline company nga mokompleto kini sa ilahang kaugalingong imbestigasyon pinaagi sa ilahang safety department ug mopakig-kooperar usab sa imbestigasyon nga ginahimo sa Spanish authorities.
