Gisugdan na sa Department of Agriculture (DA) ang imbestigasyon sa 32 ka mga lugar sa Pilipinas,kini gumikan sa mga nadawat nga reklamo nga adunay mga trader nga mopalit og palay sa ubos kaayo nga presyo gikan sa mga lokal nga mag-uuma.
Gimando sumala ni Agriculture Secretary Francisco Tiu Laurel Jr. ang imbestigasyon aron masuta ang kamatuoran sa likod sa maong isyu ug aron mapatubag ang mga posibleng responsable.Subay sa mga report nga ilang nadawat, ang presyo sa palay nga gipalit sa mga trader, naglangkob lamang sa P13 hangtod P15 kada kilo, nga layo ra sa patas nga presyo alang sa mga mag-uuma.
Apil sa imbestigasyon ang pagtino sa identity sa mga trader sa maong mga lugar aron ipasabut kung nganong ubos kaayo ang ilang gipresyo sa palay.Tungod sa sumbong, gitan-aw na usab sa DA kung unsang mga balaod, regulasyon, o administrative order ang mahimo nilang gamiton aron mapatubag ang mga trader nga nagsamok o nanamastamas sa mga lokal nga mag-uuma.Kung mapamatud-an nga tinuod ang mga reklamo, posible nga magpagawas ang gobyerno og usa ka polisiya nga magtakda og floor price sa palay, usa ka pamaagi aron protektahan ang mga mag-uuma nga namaligya sa ilang ani.
Gipasabot sa DA nga importante nga mapadayon ang “planting intention” o ang tinguha sa mga mag-uuma nga motanom pa gihapon sa umaabot nga mga panahon sa tingtanom.
