Gihangyo sa 20 ka senador si Presidente Ferdinand Marcos Jr. nga ideklarar nga mga lugar nga giapektuhan o nameligro sa epekto sa Super El Niño ang mga apektadong komunidad aron mapadali ang pagtubag sa gobyerno sa posibleng epekto sa grabeng hulaw.
Gilakip ang maong panawagan sa Proposed Senate Resolution No. 765, nga nag-awhag sa Presidente nga molihok human sa pasidaan sa Philippine Atmospheric, Geophysical and Astronomical Services Administration (PAGASA) kalabot sa nagpatigbabaw nga kusog kaayong El Niño sa Tropical Pacific.
Lakip sa mipirma sa resolusyon sila si Senate President Win Gatchalian, Senate President Pro Tempore Vicente “Tito” Sotto III, ug mga senador nga sila Kiko Pangilinan, Imee Marcos, Robin Padilla, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Erwin Tulfo, Raffy Tulfo, Ping Lacson, Chiz Escudero, Alan Peter Cayetano, Pia Cayetano, Bong Go, Camille Villar ug Mark Villar.
Gipasiugda sa mga magbabalaod ang panginahanglan nga makapangandam daan ang gobyerno sa dili pa mosamot ang epekto sa maong kahimtang sa panahon, ilabi na sa mga komunidad nga posibleng makasinati og kakulang sa suplay sa tubig ug kadaot sa agrikultura.
Base sa pinakabag-ong taho sa PAGASA niadtong Nobyembre 4, nagpatigbabaw karon ang Very Strong El Niño sa Tropical Pacific ug gilauman nga magpadayon kini hangtod sa unang bahin sa 2027. Posible usab nga moabot kini sa pinakakusog nga lebel sa dili pa matapos ang 2026.
Nagpasidaan ang ahensya sa mas taas nga posibilidad sa kakulang sa ulan nga mahimong hinungdan sa uga nga panahon ug grabeng hulaw sa pipila ka bahin sa nasud. Gilauman usab nga mas ubos sa naandang gidaghanon ang ulan sa dakong bahin sa Pilipinas karong Nobyembre.
Kahinumduman nga ang El Niño nagdala og mas init ug uga nga kahimtang sa panahon tungod sa pagbag-o sa temperatura sa kadagatan sa Tropical Pacific. Mahimong maapektuhan niini ang mga pananom, suplay sa tubig, produksiyon sa kuryente ug panginabuhian sa mga mag-uuma.
Bisan pa niini, giklaro sa PAGASA nga posible gihapon ang kusog nga pag-ulan tungod sa mga bagyo ug uban pang sistema sa panahon.
Pinaagi sa maong resolusyon, giawhag sa mga senador ang administrasyon nga sayo nang magpatuman og mga lakang aron mapanalipdan ang mga komunidad ug sektor nga posibleng labing maapektuhan sa Super El Niño.
