Nailhan ang usa ka 12-anyos nga babaye diin natalang pinaka batang inahan nga adunay napaanak sa Southern Philippines Medical Center (SPMC), kini sumala ni Dr. Mary Lee Lim, Fellow sa Philippine Obstetrical and Gynecological Society (FPOGS).
Gitaho nga malampuson ang pagpanganak sa pasyente pinaagi sa normal vaginal delivery, bisan pa sa taas nga risgo tungod sa iyang edad. Gipadayag ni Dr. Lim nga ang Davao City usa sa mga lugar nga adunay labing daghang kaso sa teenage pregnancy sa tibuok nasud.
Tungod niini, aktibong naglunsad og mga kampanya ug edukasyon ang Philippine Obstetrical and Gynecological Society (POGS) Mindanao Chapter sa mga eskwelahan aron pahimangnuan ang kabatan-onan sa mga risgo ug kahimtang nga ilang atubangon sa sayong pagpamabdos.
Base sa kasinatian sa mga pasyente, kasagarang hinungdan sa teenage pregnancy mao ang pagka-disorganisa sa pamilya, impluwensiya sa barkada, social media, kultura, tradisyon, ug ang mas grabe nga isyu sa sexual abuse.
Kalabot niini, nagpabilin ang panawagan sa mga ginikanan, eskwelahan, ug komunidad nga magtinabangay aron maprotektahan ang kabataan ug matabangan silang makaangkon og husto nga impormasyon kabahin sa reproductive health.
