Gikumpirma sa Philippine National Police (PNP) nga mikunhod ang mga nahimong datos sa election related incidents (ERI’s) karon nga eleksyon, kung ikumpara sa mga nakalabay nga eleksyon.
Subay sa datos sa PNP-Public Information Office (PNP-PIO), mi-ubos sa 53% ang kinatibuk-ang porsyento sa mga gikatalang ERI’s sa natapos nga eleksyon. Ang nahimong basihanan sa nahisgutang datos gumikan sa gikatalang 49 ka mga insidente nga makuting giberipika ug na-validate sa PNP.
Ang nahisgutang ihap ang mas ubos kung ikumpara sa gikatalang 103 nga mga insidente kaniadtong nakalabay nga Barangay ug Sangguniang Kabataan Elections (BSKE) niadtong milabay nga tuig.
Nakita usab sa PNP nga ang mga pag-ubos sa mga panghitabo karon nga eleksyon ang nagpamatuod lamang sa ilahang kaisog nga barugan aron sundon ang mga nadawat nilang direktiba kang Pangulong Ferdinand Marcos jr. ug gikan usab kang PNP Chief PGen. Rommel Francisco Marbil nga ipabiling han-ay ug malinawon ang eleksyon.
Samtang kasamtangan usab gipaubos sa hightened alert status ang nasud gawas lamang sa National Capital Region Police Office (NCRPO) gumikan sa nagpadayong election paraphernalia returns sa Commission on Elections (Comelec).
