Gikondena pag-ayo ni Deputy Speaker David “Jay-Jay” Suarez ang “weaponization” sa sayop nga impormasyon nga gihimo ug gipakatag sa mga peke nga pro-Duterte nga social media accounts, nga iyahang gibutyag nga nagapaluya sa demokrasya sa Pilipinas samtang nagkadool ang 2025 midterm elections.
Sumala ni Suarez, kini usa ka matang sa “digital warfare” ug ang gubat wala lamang sa internet kundili apil usab ang huna-huna ug kasingkasing sa minilyon nga mga Pilipino.
Reaksiyon kini ni Suarez sa report sa Reuters nga nagpadayag sa paggamit sa mga peke nga account sa social media aron daygon si kanhing Pangulong Duterte ug maimpluwensyahan ang mga diskurso kabahin sa umaabot nga eleksyon.
Subay sa research sa Israeli tech firm nga Cyabra, gibanabanaan nga usa sa matag tulo ka account nga nagapost kabahin sa posibleng pag-aresto ni Duterte sa International Criminal Court (ICC) mga peke.
Sumala pa sa report, kapin sa 45% sa mga panaghisgot kabahin sa 2025 elections ang ginapakatag sa mga pekeng account sama sa bots, fake profiles, ug mga gipangbayran nga influencers ug kini ang nakaabot sa minilyon nga ihap sa netizens.
Gipahayag ni Suarez nga nagkakusog ug nagkagamhanan ang mga disinformation networks, busa ginapalawoman karon ang tingog sa tinuod nga mga tawo sa internet, ug hinay-hinay usab nga ginaguba ang pagsalig sa katawhan sa mga institusyon nga unta nagserbisyo kanila.
Tungod niini nanawagan si Suarez sa mga dagkong social media platforms sama sa Meta, X (kaniadto Twitter), ug YouTube nga molihok gilayon ug atubangon sa seryoso ang isyu sa mga fake accounts nga nagtinabangay sa pagpakatag sa disinformation.
Sa samang higayon, iyahang gidasig ang usa ka lig-on nga kampanya alang sa digital literacy aron matabangan ang mga Pilipino nga mahibal-an ug masumpo ang online manipulation.
Gipanawagan usab ni Suarez ang tanang politiko nga ipanghimakak ang malisyoso ug bakak nga kampanya ug ipasiugda ang limpyo ug matinud-anong eleksyon.
Tapuson sumala pa niini ang toxic nga kultura sa wala pa kini makapahilo sa sunod nga henerasyon sa mga botante sumala pa ni Suarez.
