Wala’y pagbatok ang defense team ni Vice President Sara Duterte sa pagtudlo sa tulo ka amici curiae nga mga kanhing Chief Justice ug Associate Justice.
Gipadayag ni defense spokesperson Atty. Michael Poa nga abli ug consultative ang impeachment court sa mga sugyot sa mga partido, busa wala sila’y nakita nga problema sa pagpili sa mga mahimong amici curiae.
Matud ni Poa, posible nga hisgutan sa mga amici curiae ang mga kausaban sa kantidad sa assets ni Duterte, lakip ang nagkalainlaing figures nga makita sa iyang mga financial records.
Apan wala pa makahatag og tino nga posisyon ang depensa tungod kay naghulat pa sila sa mga ebidensya nga ipresentar sa prosecution kalabot sa Article II o unexplained wealth.
Dugang pa, makatabang ang mga amici curiae aron mas klaro ug mas lawom nga masabtan ang mga legal nga isyu nga nalambigit sa kaso.
Pagpasabot niya nga importante kini ilabina kay daghan nang nagkalainlaing opinyon kabahin sa maong mga isyu, lakip na sa social media.
Ang mga amici curiae gilauman nga makatabang sa impeachment court pinaagi sa legal nga mga panan-aw samtang nagpadayon ang pagdungog sa kaso.
Samtang, naghulat pa ang depensa sa kompletong presentasyon sa ebidensya sa prosecution aron masaysay niini ang ilang tubag sa Article II.
