Gawas sa pagsaka sa Women’s Tennis Association (WTA) ranking, sigurado usab ang kapin sa P19 milyon nga premyo nga madala pauli ni Pinay tennis star Alex Eala human sa iyang impresibong performance sa 2025 Miami Open.
Sa maong torneo, ang semifinal appearance pa lamang daan naghatag na kaniya og guaranteed prize nga US$332,160 kon kapin sa P19 milyon.
Kini nga kantidad layo ra kung itandi sa kinatibuk-ang $32,000 nga iyang nabulsa sa tibuok season.Kung nakaabot pa unta siya sa finals, madawat unta niini ang $597,890 (P34M), samtang kung nakadaog siya sa championship, sigurado ang $1,124,380 (P64.5M).
Human ang Miami Open, gilauman nga mosaka pa ang ranking ni Eala sa WTA.Sumala sa inisyal nga WTA live rankings, misaka na siya sa No. 75 gikan sa No. 140 sa wala pa magsugod ang Miami Open.
Nagpasabot kini nga makasulod na siya sa top 104, nga maoy basehan sa seeding process alang sa sunod nga tulo ka Grand Slam karong season.
Magsugod kini sa French Open sa Mayo.
Sa kinatibuk-an sa Miami Open, napildi ni Eala ang upat ka mga player nga sulod sa Top 25 sa WTA ranking, ug tulo kanila mga Grand Slam champion.
