Nagdeklara og pagsuspinde sa klase ang mga munisipalidad sa probinsya sa Davao De Oro ug Mati City karong adlawa Pebrero 25, 2025 gumikan sa walay puas nga pagbundak sa ulan.
Lakip sa gisuspinde ang trabaho sa mga non-teaching personnel.
Subay sa kamanduan sa probinsyal nga panggamhanan, alas 5;45 kaganihang buntag giimplementar ang walay klase gumikan sa epekto sa Esterlies nga nakahatod og mga pag-ulan sukad kagabii.
Kini ang gilangkuban sa New Bataan, Monkayo, Montevista, Compostela, Maragusan, Laak, Nabunturan, Maco, ug Mawab.
Ang nasampit nga mga munisipalidad ang nakasinati usab og mga pagbaha sa mga kadalanan ug kasapaan.
Gideklara usab kaganihang pasado alas Onsi sa udto ang suspensyon sa klase gika sa Preschool, Elementary, Secondary, Teriary Levels sa tanang public ug private schools.
Lakip usab sa gideklara ang suspensyon sa trabaho sa tanang buhatan sa gobyerno sa Mati City gumikan sa Orange rainful warning sa probinsya sa Davao Oriental.
Samtang gipadayon gihapon sa Municipal Disaster Risk Reduction and Management Office (MDRRMO) Mawab Operations and Warning Team ang walay puas nga pag-monitor sa kahimtang sa mga kasapaan aron masiguro ang kahapsay ug kaluwasan sa mga residente ilabina kadtong nagapuyo sa high-risk areas.
Gilayon usab silang nagahatag og tukma nga abiso sa katawhan aron malikayan ang posibleng kadaot nga mahimong resulta sa padayong pag-ulan nga nasinati-an sa munisipalidad ug sa ubang bahin sa Davao Region.
Gani, tungod sa hulga sa pagbaha ug landslide nga dala sa grabe nga pag-ulan, gi-awhag ang mga residente nga magbantay sa mga abiso ug pahimangno sa lokal nga kagamhanan.
Ingon man, ang MDRRMO, uban sa laing ahensya sa gobyerno, nagpakabana sa kahimtang sa komunidad ug nagpatuman sa mga lakang aron masiguro nga walay kadaot nga mahitabo.
