Gisiguro sa Davao City Agriculturist Office (CAgro) nga adunay 50,000 cacao seedlings nga ipang-apod-apod sa mga mag-uuma sa cacao ning dakbayan karong tuiga.
Gikompirma ni CAgro Cacao Focal Person Fe Oguio, nga ang pagkakuha sa mga seedlings gikan sa Department of Agriculture (DA) ug ipanghatag kini sa lima ka mga organisasyon sa mga cacao-producing areas sa Davao City.
Laraw niini nga mahuman ang pagpanghatag sa wala pa matapos ang ikaduhang kwarter sa tuig. Gipasabot ni Oguio nga sa miaging tuig, 25,000 ra ka seedlings ang na-apod-apod gumikan sa mga hagit nga nahitabo susama sa sobra nga kainit nga naka-apekto sa mga ani.
Apan karong tuiga, ang tumong niini mao ang paglabaw pa sa gihatag nga numero.
Sumala pa niini, nga ang panginahanglan sa cacao seedlings misaka gumikan sa pagtaas sa presyo sa cacao seeds, nga nagtripli sukad sa unang kwarter sa 2024.
Nag-awhag usab si Oguio sa mga mag-uuma nga gamiton ang higayon sa taas nga presyo ug magpokus sa pagpatubo og cacao alang usab sa mas daghan nga ani.
Sa pagka karon, ang Davao City adunay 7,933 ka mga mag-uuma sa cacao ug kapin sa 5,000 ka ektarya nga cacao production area.
Sumala pa sa CAgro, nga magpadayon kini sa paghatag og teknikal nga tabang sa mga mag-uuma, lakip na ang mga training ug pag-konekta sa mga mag-uuma direkta sa mga buyer aron mapamenosan ang mga intermediaries ug mas mapuslan niini ang taas nga presyo sa merkado.
Gina-awhag ang mga mag-uuma nga moadto sa mga district offices sa CAgro alang sa giya ug teknikal nga suporta gikan sa mga agricultural extension workers.
