Pinaagi sa hiniusang pwersa gikan sa Task Force Davao (TFD) ug Davao City Police Office (DCPO) nababagan ang dakong kantidad sa iligal nga droga sa Sirawan Entry Point sa Toril District kagabie.
Giila ang mga dinakpan nga si Mijan, 46-anyos, minyo, ug residente sa Tubungan, Zamboanga City, ug si Abden, 32-anyos, minyo, ug residente sa Walled, Jolo, Sulu.
Sumala pa sa report sa otoridad, pasado alas 11, kagabie, nagabiyahe paingon sa Davao City sakay ang puti nga pickup truck ang mga suspetsado.
Apan, sa pag-inspeksyon sa sakyanan nakita sa mga otoridad ang usa ka heat-sealed transparent plastic pack nga naglangkob og gibanabanang 1,020 gramos nga illegal nga droga kon shabu, nga adunay kinatibok-ang kantidad nga Php 6,936,000.
Gani misulay pa og suhol ang mga suspetsado ngadto sa mga otoridad, hinungdan sa pag rekober usab sa 16,800 pesos nga gigamit sumala pa sa mga suspetsado isip sa pangbayad sa mga otoridad kon bribery.
Sa pagka karon, ang mga nadakpan nga mga indibidwal ug ang mga nasakmit nga kontrabando anaa na sa kostudiya sa kapolisan alang sa dugang nga imbestigasyon ug sa pagpasaka og tukmang kaso.
