DAVAO CITY- Mabulukong nasaulog sa mga myembro sa chinese community ug mga dabawenyo ang selebrasyon sa Chinese New Year 2025 ‘Year of the Wood Snake’, nga gipahigayon sa Rizal Park ning dakbayan sa Dabaw karong adlawa
Sumala pa ni Public Safety and Security Office kon PSSO Head Angel Sumagaysay nga mikabat sa kapin 300 ka mga indibidual ang mitambong sa maong kasaulugan nga nasugdan bandang alas singko sa hapon ug natapos ayha pa man mag alas otso sa gabie.
Atol sa maong selebrasyon,nagpasundayag usab sa ilahang mga nindot nga performances ang mga estudyante gikan sa mga Chinese Schools dinhi sa dakbayan sama na lamang sa Davao Chong Hua High School, Davao Christian High School, Philippine Academy of Sakya-Davao ug Colegio de San Ignacio.
Dugang pa ni PSSO Head Sumagaysay nga natapos gayud ang maong selebrasyon nga hapsay ug nalingaw ang mga mitambong.
Nagpadayag usab sa iyahang mensahe ug pagbati sa bag-ong tuig si Chinese Consul General Zhao Xiuzhen atol sa speech niini.
Mipaabot usab si Davao City Mayor Sebastian ‘Baste’ Duterte sa mensahe niining paghandom sa transpormasyon, bag-ong sinugdanan ug pagkab-ot sa mga damgo sa matag usa karong tuig sa wood snake.
