Gipangulohan sa People’s Budget Coalition ang pagreporma sa sistema sa pag-apod-apod sa mga programa sa ayuda sa gobyerno aron mas sayon ug direktang maabot sa mga nanginahanglan ang tabang, nga dili na kinahanglan mangayo og tabang sa mga politiko
Sa eksklusibong pakighinabi sa Bombo Radyo, gipatin-aw ni AJ Montesa sa People’s Budget Coalition nga dili ang pagtangtang sa mga programa sa ayuda ang ilang gipangayo, kondili ang pag-usab sa proseso sa pag-apod-apod niini.
Sumala kang Montesa, importante ang paghatag og pinansyal nga tabang sa mga kabos nga pamilya, apan gikuwestiyon niini ang kasamtangang proseso sa pagkuha sa ayuda.
Lakip sa mga problema ang taas nga pagpila sa mga barangay hall, dugay nga paghulat ug ang panginahanglan sa pagkuha og guarantee letter o referral gikan sa mga politiko aron makadawat og tabang.
Matod pa ni Montesa, dili angay nga manglimos o mobati og utang nga kabubut-on ang mga lumulupyo sa mga politiko aron lamang makadawat sa tabang nga angay nilang maangkon.Tungod niini, gitinguha sa grupo nga palig-onon ang kasamtangang mga sistema sa gobyerno aron mas paspas ug sayon nga mahatag ang ayuda ngadto sa mga benepisyaryo.
Gikanayon usab ni Montesa nga sukad niadtong 2022, human sa pandemya, kasagarang gidugangan sa House of Representatives ang pondo alang sa mga programa sa ayuda.
Apan, sumala sa grupo, mahimo kining hinungdan sa pagkahimo og utang nga kabubut-on sa mga benepisyaryo ngadto sa mga politiko.
Gibutyag sa People’s Budget Coalition nga angay direktang maabot sa mga nanginahanglan ang tabang sa gobyerno nga walay pagpanginahanglan nga moagi pa sa mga politiko.
Kahinumduman nga kabahin ang People’s Budget Coalition sa mga civil society group nga miapil sa hearing sa Senate Finance Committee kalabot sa gisugyot nga 2027 national budget, diin ilang gipadayag ang mga red flag sa alokasyon sa pondo alang sa mga programa sa ayuda.
