Gipahibalo sa Regional Tripartite Wages and Productivity Board-Davao Region (RTWPB-Davao) nga magpahigayon sumala pa kini og public hearing kabahin sa ‘wage adjustments’ alang sa mga trabahante sa pribadong sektor ug mga domestic workers karong Pebrero 4, 2025 sa Grand Regal Hotel sa Lanang, ning dakbayan sa Davao.
Ang maong hearing kabahin sa mandato sa board nga magtan-aw og balik sa regional minimum wages nga nagasubay sa Republic Act No. 6727, o ang “Wage Rationalization Act,” ug sa Omnibus Rules on Minimum Wage Determination.
Ang maong sesyon maghisgot bahin sa mga kausaban sa ‘minimum wages’ alang sa mga trabahante sa pribadong sektor ug mga domestic service.
Giawhag usab sa Department of Labor and Employment-Davao Region kon DOLE-Davao ang mga interesado nga motambong sa public hearing, personal man o virtual, aron ipresentar ang ilang mga opinyon ug komento bahin sa kausaban sa kasamtangan nga ‘regional minimum wage’.
Kahinumdoman, atong miaging tuig, ang ahensya nag-aproba og ‘wage increase’ alang sa mga domestic workers sa rehiyon ubos sa Wage Order No. RBXI-DW-03.
Nagsugod kini atong Marso 6, 2024 nga ang bag-ong monthly minimum wage alang sa mga domestic workers mamahimo nga P6,000 sa ‘chartered cities’ ug ‘first-class municipalities’, ug P5,000 sa uban pang mga lungsod.
Ang RTWPB-Davao usab nag-aproba og P38 matag adlaw nga wage increase alang sa minimum wage workers sa rehiyon nga gipatuman pinaagi sa duha ka bahin.
Ang unang bahin nga P19 nagsugod kaniadtong Marso 6, 2024, ubos sa Wage Order No. RBXI-22, samtang ang ikaduhang bahin nga P19 usab nagsugod kaniadtong Setyembre 1, 2024.
Gumikan niini, ang bag-ong minimum wage alang sa mga non-agriculture workers mamahimo na nga P481 matag adlaw, samtang ang mga agriculture workers makadawat ug P476 matag adlaw.
