Nadakpan na ang 7 ka mga suspetsado nga maoy gitudlo nga responsable sa pagpamusil patay sa usa ka magtiayong online seller sa Mexico Pampangga niadtong petsa 4 ning bulana, atol sa gipahigayong managlahing operasyon sa kapulisan sukad pa niadtong Biyernes.
Nadakpan sa Nueva Ecija ug Pampangga ang mga gunmen, lakip na usab nga naaresto kagahapong adlawa ang gitudlong mastermind matud pa sa pagpatay sa mag-asawang negosyante.
Subay sa imbestigasyon sa Police Regional Office III, usa matud pa sa rason og nganong gipapatay kini sa maong Mastermind, gumikan sa utang niini ngadto sa magtiayon nga mukabat og P13 Million rason nga gipamusil kining mga biktima nga sila Arvin ug Lerma Lulu.
Dugang pa nga mukabat sumala pa og P900,000 ang gihatag nga suhol sa Mastermind ngadto sa mga gunmen aron nga ipapatay kining magtiayon, diin niadtong bulan sa Agosto matud pa kining giplanohan.
Nasayran nga ninong pa sa anak sa mga biktima ang maong gitumbok nga Mastermind ug suod pa kining managhigala.
Nakuha usab gikan sa mga suspek ang mga nagkadaiyang matang sa armas, granada, ug katana.
Narekober sab ang mga motorsiklo nga maoy gigamit sa krimen.
Lakip sab sa gibutyag sa mga otoridad nga notorious nga Gun-for-hire sumala pa ang maong grupo sa Central Luzon nga kaniadto nang nalambigit sa 22 ka mga murder cases.
Sa karun, tingkagol na kini sa bilanggoan, ug kasong two counts of murder ug Illegal Possession of Firearms and explosives ang ipasaka nga kaso batok sa mga suspetsado.
Giisip na usab kini sa kapulisan nga case solved na ang maong kaso.
