Nagtanyag ug hangtod P20 milyon nga ganti ang kagamhanan sa mga makatudlo ug impormasyon alang sa pagkasikop sa mga smuggler ug hoarders sa mga agricultural product.
Sumala kang Agriculture spokesperson ug Assistant Secretary Arnel De Mesa, ilawom sa bag-ong balaod sa Anti-Agricultural Economic Sabotage Act, maisip nga economic sabotage ang hoarding o smuggling nga kapin P10 milyon sa agri products.
Nakalatid sab sa bag-ong balaod nga ang mga mapamatud-an nga sad-an ang mag-atubang sa tibuok kinabuhi nga pagkabilanggo nga walay girekomendang piyansa ug pamultahon ug lima ka higayon nga kantidad sa nakumpiskang mga produkto.
Pananglitan sumala pa sa opisyal nga kung ang kantidad sa smuggled goods ang nagkantidad ug P100 million, mahimo na kining P500 million ang bayaran sa Smuggler.
Kahinumduman nga una na kining gipirmahan ni PBBM sa nakalabay nga semana aron nga masulbad ang pagpaplusot sa atong nasud sa mga produkto ilabi na sa agrikultura nga dakong hulga sa atong ekonomiya.
