Gipasalig karon nga adunay dugang pa nga suplay sa bugas nga gikan sa National Irrigation Administration XI nga mabaligya sa kantidad nga P29 ang matag kilo.
Kini ang gibutyag sa buhatan nga mamahimong mapalit gihapon ang nasampit nga bugas nga ipamaligya sa matag buhatan sa probinsya sa NIA-11.
Apan sa pagkakaron wala pa’y gikatakda nga adlaw kung kanus-a kini ipahigayon.
Samtang gipaklaro usab niini nga ang mamahimong makapalit sa nasampit nga bugas mao ang mga senior citizens, persons with disabilities, myembro sa 4P’s ug solo parents.
Kahinumduman nga gidagsa sa katawhan ang pagpamaligya sa buhatan sa nasampit nga kantidad sa bugas sukad niadtong Byernes. Sumala pa sa buhatan nga adunay 500 ka mga sako sa bugas ug tag napulo ka kilo sa matag indibidwal.
Nasayran nga kining gibaligya nga bugas ang naggikan sa mga hybrid nga matang sa bugas nga gikan sa Davao De Oro, Davao Oriental ug Davao Del Norte.
