DAVAO CITY- Giawhag karon sa kadumalaan sa Regional Development Council ang mga pribadong sektor nga magtukod ug usa ka industrial park dinhi sa dakbayan sa Davao.
Sumala pa ni Arturo Milan, co-chair sa Regional Development Council 11 (RDC 11), nga ang pribadong sektor sa syudad ang dugay na nga naghulat sa taas nga panahon alang sa economic zone nga i-istablisar dinhi sa dakbayan.
Ang gilaraw nga industrial park mao kini ang usa ka dakong luna nga ipreserba alang sa katukuran sa mga planta ug ubang industrial enterprises.
Gikanayon sab ni Milan nga sa karon ang LGU Davao walay dakong bahin sa luna nga magamit isip usa ka ecozone.
Gumikan niini nanghinaot ang opisyal nga adunay pribadong sektor nga momuntar niini nga gihimong pananglitan ang syudad sa Panabo nga adunay pribadong sektor nga nagtukod ug industrial zone sa syudad.
Gitumbok no Milan ang Anflo Industrial Estate (AIE),diin adunay 63 ektaryas ang kalapdon sa industrial Special Economic Zone nga rehistrado sa Philippine Economic Zone Authority ug gikonsidera nga Philippines’ Premier Agro-Industrial Hub ug kini ang nahimutang sa strategic location nga natung-an sa duha ka mga dagkong syudad sa Tagum City ug dinhi sa dakbayan sa Davao.
