Kabsan sa kinabuhi ang usa ka mag-uuma human kini napusilan samtang gigukod nini og lagaraw ang kapitan sa Purok Eagle, Brgy Kauswagan, Matanao, Davao del Sur, kagahapon.
Giila ang mag-uuma nga si Juanito Llego, 47 anyos, minyo, ug residente sa maong dapit.
Sa inisyal nga imbestigasyon, nalisoan sa maayong pangisip si Juanito niadtong tungura samtang nagdala-dala og lagaraw rason nga nangalisang ang iyang pamilya ug kasilinganan og gilayong nanawag og tabang ngadto sa kapitan.
Miresponde gilayon si Kapitan Rafael Laude Gerald Jr. sa maong dapit aron unta istoryahon ug hatagan og alibyo ang problema sa panghunahuna si Juanito, apan inay nga mukalma nasuko hinoon kini ug gipanggukod ang grupo ni Kapitan og lagaraw.
Ulahi nga nakadagan si Kapitan Rafael niadtong higayona rason nga natigbasan ang lapa-lapa niini.
Nisulay pa sa paglikay si Kapitan Rafael atol sa iyang pagpanigbas apan nagpadayon ang aksyon sa suspek rason nga wala nay nahimo ang kapitan kondi ang pusilon na lamang kini.
Dali nga gipangdala sa balay tambalanan ang duha apan gideklarang dead on arrival na ang suspek pag-abot sa hospital.
Wala na say plano mopasaka og kaso ang pamilya sa supek ngadto sa kapitan sanglit self-defense lamang ang gibuhat niini.
Ning kasamtangan, padayon nga nagapaalim sa balay tambalanan ang kapitan samtang gikustodiya na sa mga otoridad ang iyang armas.
