Mikabat sa 13,557 ka pasahero ang nanggawas ug 13,930 ang misulod sa nagkadaiyang pantalan sa tibuok nasud gikan alas-12:00 sa tungang gabii hangtod alas-6:00 sa buntag niadtong Oktubre 30, 2026, sumala sa Philippine Coast Guard (PCG).
Aron masiguro ang kaluwasan ug kahapsay sa pagbiyahe sa dagat atol sa Undas 2026, nagdeploy ang PCG og kinatibuk-ang 6,061 ka personnel gikan sa 17 ka Coast Guard Districts sa tibuok nasud.
Gipahigayon usab sa mga personnel ang inspeksiyon sa 184 ka barko ug 63 ka motorbanca isip kabahin sa kampanya sa pagsiguro nga luwas ang mga pasahero sa ilang pagbiyahe.
Samtang, gipahimutang sa PCG ang tanang distrito, estasyon ug sub-estasyon niini ubos sa heightened alert gikan Oktubre 29 hangtod Nobyembre 3, 2026, tungod sa gilaom nga pagdaghan sa mga pasaherong mobiyahe pauli ug mobisita sa ilang mga minahal atol sa Undas.
Gipasalig sa Coast Guard nga ipadayon ang hugot nga pagbantay ug inspeksiyon sa mga pantalan ug barko aron malikayan ang mga insidente ug mapanalipdan ang kaluwasan sa mga biyahero.
