DAVAO CITY- Gikumpirma sa tigpamaba sa Police Regional Office XI ang pagtuboy kay PCol. Hansel Marantan isip Acting City Director sa Davao City Police Office, epektibo kagahapong adlawa.
Si PCol. Marantan ang nipuli kay PCol. Sherwin Butil isip officer in charge sa DCPO pipila lamang ka oras human ang pagtanggal sa pwesto ni PCol. Lito Patay.
Kahinumduman nga kagahapong adlawa usab opisyal nga nilingkod si PCol. Patay isip bag-ong direktor sa DCPO apan human ang kapin upat ka oras, nakadawat kini og tawag sa matud pa paghulip nasab kaniya.
Gumikan niini, nakaani og managlahing rekasyon sa mga dabawenyo ang matud pa dili masabtang aksyon sa PNP kalabot sa pagtalaga og mga opisyal sa dakbayan sanglit sulod lamang sa usa ka adlaw, tulo na ka mga pangalan ang nahimong hisgutanan.
Una nang gikabutyag sa tigpamaba sa Davao City Police Office nga si P/Capt. Hazel Tuazon, nga nagabase lamang sila sa mga ginapanaog nga order sa regional office kalabot sa maong mga lakang. Ning kasamtangan, wala pay gipaguwa nga rason ang kaulohan sa PNP kalabot sa maong panghitabo.
Ning kasamtangan, si PCol. Marantan ang gituboy nga Acting City Director apan wala pa usab dugang impormasyon kalabot sa iyang paglingkod.
