Andam ang Department of Social Welfare and Development (DSWD) nga magpadala og mobile water treatment units ug water tanker sa mga komunidad nga makasinati og kakulang sa limpyo nga tubig tungod sa Super El Niño ug uban pang kalamidad.
Sumala kang DSWD Disaster Response Management Bureau Director Maria Isabel Lanada, makahimo ang mga mobile water treatment unit sa pagproseso sa tubig nga gikan sa mga atabay, suba ug uban pang tinubdan sa tubig.
Aduna usab ang ahensya’y duha ka water tanker, diin ang usa gigamit sa pagproseso sa tubig, samtang ang ikaduha alang sa pag-apod-apod sa tubig nga mainom.
Matod ni Lanada, ang maong mga kagamitan makahimo sa pagproseso og hangtod 2,500 ka litro nga tubig matag oras.
Gawas niini, andam usab ang DSWD nga moapod-apod sa 21 mil ka family water filtration kit ngadto sa mga lokal nga panggamhanan nga nagkinahanglan og limpyo ug luwas nga tubig nga mainom.
Prayoridad sa ahensya ang pagtabang sa mga lokal nga panggamhanan nga nagdeklarar og state of calamity tungod sa epekto sa Super El Niño.
Apan gikinahanglan una nga makig-alayon ug mosumiter og hangyo ang mga lokal nga panggamhanan ngadto sa DSWD sa dili pa ipadala ang mga kagamitan.
Gipahinumdoman usab sa ahensya nga mahimong gamiton ang filtration kit sa pagsala sa tubig gikan sa mga sapa, tubig-ulan, deep well ug bisan sa tubig nga ihatod sa mga fire truck panahon sa emerhensya.
Samtang, nag-andam pa ang DSWD og dugang mga lakang aron masiguro ang suplay sa tubig ug uban pang batakang panginahanglanon sa mga pamilyang maapektuhan sa grabeng hulaw.
Mahimo usab nga makakuha og tubig ang mga komunidad gikan sa mga water reservoir nga gitukod ubos sa Project Local Adaptation to Water Access o LAWA, basta adunay igong suplay ug luwas kini nga gamiton.
