DAVAO REGION- Gipaklaro karon ni Department of Agriculture XI Regional Director Macario “Bong” Gonzaga nga walay kamatuoran nga adunay kakulangon sa bugas dinhi sa dakbayan.
Kini human sa mga mikatag nga post sa social media post nga adunay pipila ka mga residente nga wala nay mapalitan og bugas.
Tungod niini, sumala pa sa opisyal nga iyahang ipatawag ang mga namaligya ug bugas sa dakbayan ug ipahigayon ang usa ka meeting aron sutaon kung unsa ang kamatuoran sa mga reklamo karon nga anaa sa social media.
Pagpaklaro pa ni Gonzaga nga nga walay shortage sa bugas dinhi sa syudad gumikan daghan ang suplay subay kini sa ilahang gihimong imbentaryo.
Sa karon nag-awhag ang opisyal sa mga katawhan nga nakasinati ug kalisod sa pagpalit ug bugas nga mokontak sa ilahang buhatan ug ipadangat ang mong reklamo aron kini maaksyunan.
Sa pagpanubay sa Bombo Radyo team adunay pipila na ka mga dagkong tindahan sa Bangkerohan ang wala nay stocks sa mga sinakong bugas ilabi pa sa mga imported nga bugas nga sagad ginapalit sa mga konsumante.
