Homan sa pagsaka sa kaso sa dengue taliwala sa tag-ulan, gipahayag ni Health Secretary Ted Herbosa nga mamahimong aprubahan na sa Philippine Food and Drug Administration (FDA) karong tuiga nga makabaton ug lisensya ang second-generation dengue vaccine.
Gihisgutan ni Herbosa ang QDENGA vaccine sa Takeda Pharmaceuticals nga nakabase sa Japan nga nag-apply sa certificate of product registration (CPR) gikan sa FDA niadtong milabay nga tuig.
Niadtong milabay nga bulan, nanawagan ang mga pangulo sa pipila ka grupo sa mga doktor sa FDA nga aprubahan ang lisensyang QDENGA, gumikan kay ang Pilipinas ang naulahi sa mga silingang nasud pag-abot sa bakuna batok sa impeksyon sa virus.
Dugang gipahayag sa opisyal nga nakighinabi na kini sa Takeda Pharmaceuticals niadtong milabay nga tuig ug gihulat na lamang ang pagtuon sa FDA nga adunay kalabutan sa pag-apruba sa bag-ong bakuna.
Tuig 2017, nahimong kontrobersyal ang Dengvaxia dengue vaccine homan gipahibalo sa manufacturer nga Sanofi Pasteur nga ang nahisgutang bakuna ang mahimong makahatag ug severe symptoms sa wala pa na-infect sa dengue una mabakunahan.
Gumikan niini, gimando sa FDA ang suspension sa pagbaligya, distribution, marketing sa bakuna lakip na ang pag-withdraw sa produkto sa merkado.
Samtang ginahulat ang paghiabot sa second-generation dengue vaccine sa Pilipinas, gikanayon sa opisyal nga ang vector control pa gihapon ang nag-unang solusyon sa pagtubag sa problema sa dengue ning panahon sa ting-ulan.
Sa kasamtangan, wala pa gihapoy partikular nga pagtambal sa dengue.
Subay sa datos sa DOH, misaka ug gamay ang mga kaso sa dengue ug mukabat sa 10% gikan sa 5,547 nga gika-report niadtong Mayo 5-18, hangtod sa 6,082 nga kaso niadtong Mayo 19 ug Hunyo 1.
Sukad sa pagsugod sa tuig hangtod Hunyo 15, adunay kinatibuk-ang 77,867 ka mga kaso sa dengue ang gika-report sa tibuok nasud ug mukabat sa 205 ang nakabsan sa kinabuhi.
