Gitambagan ni Ombudsman Jesus Crispin Remulla ang mga kanhi bodyguard ug staff nga giingong konektado kang kanhi Ako Bicol Representative Zaldy Co nga magsumite sa ilang tagsa-tagsang gipanumpaan nga affidavit kabahin sa nagpadayong imbestigasyon sa giingong anomalosong flood control projects.
Matud ni Remulla, importante nga makahatag og magkahiusa apan lahi-lahing testimonya ang matag indibidwal aron makatabang sa lawom nga imbestigasyon sa Office of the Ombudsman.
Gikatakdang moatubang sa mga imbestigador ang mga nagpailang “bag-men” ni Zaldy Co sa Hunyo 11, 15 ug 16.
Sumala ni Assistant Ombudsman Mico Clavano, dugay na nilang gihinabi ang mga nalambigit isip kabahin sa ilang paningkamot nga masusi ang tanang posibleng ebidensya.
Una nang gipahibalo ni Atty. Levi Baligod, tigpamaba sa 18 ka “maleta boys,” nga andam ang iyang mga kliyente sa pagsumite og dugang nga ebidensya lakip ang mga litrato ug video nga giingong adunay kalambigitan sa alegasyon sa pagpanghatag og kwarta.
Matud pa, giakusahan sa grupo ang pipila ka opisyal ug iladong personalidad nga nakadawat kuno og mga maleta nga adunay sulod nga kwarta nga giingong gimando sa puganteng si Zaldy Co.
Apan, hugot kining gilimod sa pipila ka mga personalidad nga nalambigit sa maong mga alegasyon.
