Gilayon nga gipalihok sa 10th Infantry (Agila) Division ang iyang mga Humanitarian Assistance and Disaster Response (HADR) units human sa magnitude 7.0 nga linog nga miigo sa pipila ka mga lugar sa Mindanao karong adlawa Hunyo 8, 2026.
Human madawat ang mga report kabahin sa insidente, gipataas gilayon sa dibisyon ang alert status sa mga yunit niini ug nagdeploy og mga disaster response team gikan sa 27th Infantry Battalion, 28th Infantry Battalion, Task Force GENSAN, 1002nd Infantry Brigade ug 10th Emergency Response Company aron motabang sa mga apektadong komunidad ug mosuporta sa nagpadayong mga operasyon sa emerhensiya.
Sa pagkakaron, nagpadayon pa ang mga tropa sa disaster response ug rescue operations, damage assessment, paghinlo sa mga dalan ug uban pang humanitarian assistance activities, uban sa koordinasyon sa Office of Civil Defense, mga lokal nga panggamhanan, Philippine National Police, Bureau of Fire Protection ug uban pang kaabag nga ahensya.
Matud ni Major General Alvin Luzon, Commander sa 10th Infantry (Agila) Division, nagpabiling andam ug aktibo ang dibisyon sa pagtabang sa mga komunidad nga naapektuhan sa linog.
“Ang among mga tropa, ilabina kadtong ubos sa Task Force GENSAN ug 1002nd Infantry Brigade, anaa na karon sa mga apektadong lugar aron magpatuman sa disaster response ug rescue operations. Uban sa hugot nga koordinasyon sa Office of Civil Defense, mga lokal nga panggamhanan ug mga partner agencies, magpadayon kami sa paghatag og suporta aron masiguro ang kaluwasan ug kaayohan sa atong mga isigka-Mindanawon niining panahon sa kalisod,” matud ni Luzon.
Padayon nga gibantayan sa 10th Infantry Division ang kahimtang ug naghatag sa gikinahanglang tabang ngadto sa mga komunidad nga naapektuhan sa linog.
