Nahimong malamposon ang gipahigayong Nationwide Simultaneous Earthquake Drill (NSED) diin ang 2nd quarter sa maong aktibidad gihimo gahapon sa hapon, June 28, 2024.
Gipasabot sa Office of the Civil Defense XI nga angay sigurohon sa tanang establisyemento, mga buhatan lakip na ang mga nagkadaiyang mga eskwelahan ning rehiyon nga dapat realistic ang mga ipahigayong earthquake drill alang sa kasayuran sa tanan.
Matod pa ni Karlo Alexie Puerto, Information Officer sa Office of the Civil Defense (OCD)-XI, gibutyag niini nga walay gipili nga panahon ang linog ug unsa mang kalamidad, rason nga kinahanglang mabansay ang publiko sa paghimo og drill sa unsa mang panahon.
Dugang pa sa maong opisyal nga angay usab mag-matngon ang publiko nga mamahimong sugdan ang inisyatibo sa kaugalingon sama na lamang sa pagbibit og payong ug uban pang mga lakang isip proteksyon na usab sa pabag-o bag-ong klima dinhi sa rehiyon.
Matud Puerto, gawas sa government offices, importante sab ang partisipasyon sa mga pribadong institusyon ilabi na kadtong mga eskwelahan nga daghan ang populasyon.
Atol sa drill, gi-practice ang pag-duck, cover and hold aron nga mahimo kining muscle memory aron maandam kanunay ang tanan kung unsay buhaton panahon sa linog.
