DAVAO CITY – Gikabalak-an sa Commission on Population and Development ang mga gikatahong sayong pagmadbos ug pagpanganak sa mga kabataang anaa sa linghod nga pangidaron.
Sumala sa datos sa ahensya, anaa sa 241 ang mga nanganak sa Davao Region niadtong tuig 2022 nga anaa sa 10 ngadto 14 anyos ang pangidaron. Samtang anaa sa 9,364 ang nag-idad og 15 hangtod 19 anyos.
Tungod niini, gihatagan og gibug-aton sa ahensya ang importansya sa Comprehensive Sexuality Education alang sa mga ginikanan ug mga estudyante aron mabatukan ang teenage pregnancy sa Davao Region.
Tumong karon sa ahensya sa paghatag og impormasyon ug mga kahanas sa kinabuhi ngadto sa mga batan-on, pagtubag sa mga socio-economic challenges, ug pagdasig sa partisipasyon sa komunidad pinaagi sa mga kalihokan sa Sangguniang Kabataan.
Sumala ni Lolito Tacardon, Deputy Executive Director of CPD-Central Office, gipunting sa inisyatiba ang mga batan-on nga henerasyon nga makunhuran ang mga pagmabdos sa mga tin-edyer, nga adunay mga katuyoan nga gitakda nga makab-ot sa 2028.
Ang mga paningkamot sa CPD nahiuyon sa mga palisiya sama sa Responsible Parenthood ug Reproductive Health Care Law, nga nagmando sa sex education sa mga tulunghaan.
Dugang pa, ang CPD nagtrabaho sa pagpalig-on sa Executive Order 141, nga gipirmahan ni Kanhi Presidente Rodrigo Duterte niadtong Hunyo 25, 2021, nga nagdeklara sa teenage pregnancies nga usa ka nasudnong prayoridad.
Ang EO 141 nag-ila sa mga hinungdan sa teenage pregnancy, lakip ang diskriminasyong mga buhat, kakulang sa impormasyon ug edukasyon, ug mga hagit nga giatubang sa mga rural nga komunidad.
