Gipahinumduman sa department of Health (DOH) ang publiko nga wala pay magamit nga tambal sa dengue nga napamatud-ang epektibo ug gisupotahan sa pagtuon.
Gihimo sa DOH ang pagpahinumdum taliwala sa padayong pag-obserba sa mga kaso sa dengue sa nasud.
Sa kasamtangan, gipahayag ni DOH medical officer Dr. Kim Patrick Tejano nga walay seguradong tambal sa dengue.
Gipahayag pa niini nga adunay kasamtangang pagtuon sa posibleng tambal sa dengue apan wala pay napamatud-an ang ka-epektibo sa pagkakaron.
Nagpasidaan usab kini sa pagamit sa alternatibo ug herbal treatments alang sa dengue susama sa tawa-tawa, siling labuyo ug bayabas.
Sa gipagawas nga datos sa DOH ang ihap sa kaso sa dengue sa nakalabay nga tulo hangtod sa upat ka semana ang anaa na sa 5,368 nga halos susama sa gika-report sa nakalabay nga duha semana nga anaa sa 5,305.
Samtang mukabat sa pito ka mga rehiyon ang nagpakita ug pagsaka sa mga kaso sa nakalabayng tulo hangtod upat ka semana lakip na ang Cordillera, Ilocos, Zamboanga Peninsula, Cagayan Valley, Caraga, Mimaropa ug Northern Mindanao.
