DAVAO CITY – Gibutyag sa Philippine Statistics Authority XI nga ,misaka ang inflation rate sa Davao Region alang sa bottom 30% income households.
Misaka sa 6.1% niadtong Mayo 2024 kung itandi kini sa 5.5% niadtong Abril ning tuig kasamtangan. Sumala pa sa maong buhatan nga rason sa maong pagtaas sa inflation mao ang paspas nga tinuig nga pagtubo sa index sa housing, water, electricity, gas, ug other fuels, nga anaa sa -7.8% gikan sa -10.2%.
Samtang, ang tinuig nga pagtaas sa pagkaon ug non-alcoholic beverages, anaa sa 11.1% gikan sa 10.6% ug ang transportasyon, anaa sa 4.4% gikan sa 4.3%.
Sa pikas bahin, namatikdang aduna usab nga pagkunhod sa indices sa nagkalain-laing mga palaliton dinhi sa rehiyon, lakip niini ang alcoholic beverages ug tobacco nga anaa sa 5.1% gikan sa 5.9%, sanina ug footwear, nga anaa sa 4.6% gikan sa 4.8%.
Alang sa mga kagamitan sa panimalay ingon man maintenance, anaa kini sa 3.3%, health, 2.4%, recreation, sport, ug culture, 8.7%.
Ang inflation sa pagkaon alang sa bottom 30% income households sa rehiyonal nga lebel, misaka sa 11.4% sa miaging bulan gikan sa 10.9% niadtong Abril 2024.
Ang nag-unang kontribusyon sa kinatibuk-ang inflation sa pagkaon sa rehiyon sa miaging bulan mao ang isda ug uban pang seafood nga anaa sa 7.6% gikan sa 5.7%, mga gulay ug prutas, nga anaa sa 11.7% gikan sa 8.9%, ug oils ug fats nga anaa sa 4.5% gikan sa 10.7%. Samtang sa ubang grupo sa pagkaon, ang asukal, confectionery ug desserts, anaa sa -4.6%, ug ang ready-made nga mga pagkaon ug ubang produkto, anaa sa 9.2%.
