DAVAO CITY – Gipasakahan na ug kaso ang suspek sa pagpatay sa usa ka ginang human nga mitahan kini sa kapulisan.
Subay sa report sa kapulisan sa Tugbok nga ang suspek naila nga si Sergio Pornolles Jainar.
Nasayran nga kasong homecide ang gipasaka sa kapulisan ngadto na sa suspek nga kaipon ta usab sa biktima nga karon anaa na sa kostudiya sa kapulisan.
Kahinumduman nga niadtong petsa dos sa Hunyo,pasado alas syete sa gabii nahitabo ang pagdunggab patay ngadto sa 55-anyos nga biktima nga si Emilia Fuentes Abo-abo sa ilang panimalay sa Purok 10, Brgy. Tacunan, Tugbok District ning syudad.
Sa imbestigasyon, ayha ang krimen dungan pa nga nakig-inum ang maglive-in partner sa ilang mga higala sa usa ka construction site sa Mintal ug niuli bandang alas singko sa hapon.
Apan pagkagabie nadunggan na lamang sa silingan ang syagit sa biktima nga nagpakitabang ug nakita na lamang nila nga ang suspek nga si Sergio miguyod sa lawas sa biktima sa hagdanan gikan sa ikaduhang andana sa ilang balay dayon niikyas.
Narekober sa mga niresponding mga pulis sa crime scene ang usa ka kitchen knife samtang ang biktima naabtang nga nagbuy-od na ug naligo sa dugo tungod sa mga samad dinunggaban nga nahiaguman sa dughan ug agtang ug lakip sa iyang mga kamot.
