DAVAO CITY- Hustisya ang gipangayo karon sa mga anak ug kabanay sa 55-anyos nga biktima sa pagpanunggab sa iyahang kaipon pasado alas siete ang takna sa gabii.
Nanawagan karon ang mga anak sa biktima ngadto sa kapulisan nga gilayong madakpan ang suspek nga naila nga si Cobar Fornolles nga daling misibat human sa pagpatay niini kang Emilia Fuentes Abo-Abo nga iyahang kaipon.
Subay sa report sa kapulisan sa Tugbok nga usa ka concerned citizen ang nagpahibalo kanila kabahin sa usa ka komosyon nga nahitabo sa Purok 10, Burgunde St., Brgy. Tacunan, Tugbok Dist.,ning dakbayan sa Davao.
Gilayon nga girespondehan ang maong panghitabo ug nasuta sa imbistigador nga sa wala pa nahitabo ang pagpatay sa biktima, pasado alas dusi sa udto niadtong Dominggo, ang biktima ug mga higala niini nag-inom uban ang iyahang kaipon nga construction worker sa construction site sa KISAN LU.
Pagka-alas singko pasado sa hapon, ang biktima ug ang suspek nakadisidar nga mouli sa ilahang balay. Pasado alas siete sa gabii, gikanayon sa wala panganling babaeng caller nga nanihapon sila uban ang iyahang pamilya niadtong tungura apan kalit lamang kining nakadungog ug tingog sa babae nga misyagit ug nangayog tabang.
Gilayon nga giadtuan niini ang balay sa biktima, samtang nagkaduol siya sumala pa nakita niini ang suspeknga adunay giguyod gikan sa ikaduhang andana sa ilahang balay. Dayon ang suspek gilayon nga misibat sa wala matino nga dieksyon.
Miuli ang caller sa ilahang balay, apan ang duha niini ka mga silingan ang nakadungog sab sa singgit sa biktima ug ilaha sab nga gisubay ang balay niini ug nadiskubrihan nga nadusmpo na ang nawong sa biktima sa salog ug wala na manglihok samtang naligo na kini sa iyahang kaugalingong dugo.
Gumikan niini gilayon silang nanawag ug kapulisan. Pasado alas nuybi sa gabii niabot ang SOCO team, sa crime scene ug sa gihimong imbistigasyon narekober ang kitchen knife nga nagkdugo nga gigamit sa pagdunggab samtang nasuta sa otoridad sa patay nga lawas sa biktima ang duha ka mga samad dinunggaban sa iyahang dughan.
Padatyon pa sab karon nga ginaimbistigahan sa kapulisan ang motibo sa pagpatay ngadto sa biktima.Sa karon gihaya na ang patay nga lawas sa biktima sa iyahang mga kabanay.
