-- ADVERTISEMENT --
DAVAO CITY-Nag-awhag ang Davao City AIDS Council ngadto sa katawhan nga mamahimong batasanon ang pagpa-HIV test aron malikayan ang pagdaghan sa mga kaso sa HIV ug Acquired Immunodeficiency Syndrome kon AIDS.Sumala ni Dr. Jordana Ramiterre, ang head sa Reproductive Health and Wellness Center, nagpasiugda na ang konseho sa prevention education ug nagpahigayon og orientation. Gilainlain nila ang paghatud sa maong serbisyo, lakip ang facility-based testing, community-based screening, ug self-testing.
Dugang pahibalo pa ni Dr. Kris Trangia sa Department of Health Region XI (DOH RXI) ang importansya sa pagkahibalo sa kahimtang sa usa ka tawo, bisan pa kon negative or positive kini sa maong sakit, ug dili dapat himoong ilambigit sa peligroso nga kinaiya ang pagpa-test alang niini.
Gikatala usab sa Department of Health nga sagad mataptan sa maong virus ang anaa sa pangidaron nga 25 anyos nagdto sa 34-anyos. Makaapekto sa pagdawat sa mga tawo sa pagpa-test ug pagtambal ang mga cultural factors ug external discrimination.
Aron maatubang ang stigma sa kaugalingon o internal nga diskriminasyon, giawhag sab ang mga peer support groups aron dasigon ang mga tawo nga adunay HIV nga magpatambal o magpa-test. Ang Davao City AIDS Council nag-awhag sa mga Dabawenyo nga magpa-eksamin ug mogamit og proteksyon sa panahon sa pakighilawas, ug maghatag ug saktong edukasyon sa reproductive health ug early detection.Libre ang mga pagsulay sa HIV sa mga sentro sa pagsulay sa gobyerno, kauban ang pre-testing ug post-testing counseling.
Sa pikas bahin, nag-una karon ang Davao City sa adunay pinakataas nga kaso sa Human Immunodeficiency Virus (HIV) sa tibuok Davao Region niadtong 2023. Sumala sa Department of Health kon DOH nga adunay natalang 7,066 ka kaso niini sa Davao Region nga gipangunahan sa dul-an 5,000 sa Davao City, kapin 1,000 sa Davao del Norte, kapin 400 sa Davao del Sur ug Davao de Oro, kapin 200 sa Davao Oriental ug kapin 100 sa Davao Occidental.
via || DMA
