DAVAO DE ORO – Nailhan na ang ikaduhang patayng lawas nga napalgan niadtong Mayo 13, Lunes sa hapon, sa Brgy. Tagdangua, Pantukan, Davao de Oro. Subay sa taho sa Pantukan Municipal Police, giila ang maong lalaki nga usa ka Rajid Kalingan Alilian, nagpuyo sa Lupon, Davao Oriental.
Kahinumduman nga unang giila ang naplagan nga patayng lawas bandang alas-6:30 sa buntag sa susamang barangay nga usa ka Rey Quidato, 44 anyos.
Samtang sunod nang napalgan bandang alas-9:47 sa buntag ang duha ka patayng lawas sa kadalananan sa Prk. 1 Barangay Panibasan sa Maco nga sila Joseph Mifania Cosal, 40 anyos, usa ka chainsaw operator nga nagpuyo sa Purok 5 San Antonio, Mabini; ug Aldrin Catubay Dagsangan, 37 anyos nga minero ug residente sa Purok 3, Barangay Napnapan, sa Pantukan.
Gikabutyag sa Maco Police Chief nga si PLTCOL. Ranel Marquizo nga ipailawom sa profiling ang duha ka mga biktima nga nakit-an sa Maco gumikan dili sila residente sa maong lungsod.
Dugang pa nga ginasubay pa ning kasamtangan sa Davao de Oro Police Provincial Office ang anggulong pagkakonektado sa usa ka krimen ang maong insidente diin sumala pa nga nalakip ang mga biktima sa mga drug personality sa milabay nga katuigan.
Lakip nga ginatutukan anggulo usab sa kapulisan ang personal grudge bahin sa ilahang trabaho.
Samtang gipasalig sab sa publiko nga wala’y angay kabalak-an ang mga residente sa probinsya tungod gisiguro sa kapulisan ang kaluwasan sa publiko.
via || Bombo LJF
