DAVAO CITY – Malipayong nagpaambit ang Department of Trade and Industry 11 sa pagdalit niini og OTOP kon One Town, One Product Program nga usa ka programa alang sa mga Micro, Small, and Medium-scale enterprises kon MSMEs sa nasud.
Sumala ni Mary Rose Borinaga, ang Senior Trade and Industry Development Specialist sa DTI 11 atol sa ekslusibong pakighinabi sa Bombo Radyo Davao, tumong sa maong programa nga masuportahan ug matabangan ang mga gagmayng negosyante nga mapakita ang ilahang mga gipasigarbong produkto sa nagkalain-laing lokalidad.
Usa sa ginatutukan sa usa ka OTOP product sa ahensya ang pag-market sa ilahang produkto pinaagi sa product development nga naglakip sa pag-testing, pag-label ug pag-assess sa marketability niini.
Lakip na ang ihatag nga training ug technologies nga ilang ipabansay alang sa mga tigbuhat, brand equity and development, ug ang marketing sa maong produkto.
Tumong sab sa maong programa ang pag-endorso sa mga OTOP products ngadto sa mga lokal ug internasyonal nga merkado pinaagi sa OTOP Philippines Hub diin ginabaligya ang mga produkto nga dunay assistance gikan sa DTI sama sa processed fruits, kakanin, kape, cacao, agriculutral products, fashion accessories, housewares, ug mga serbisyo sama sa hilot, sculpting, wellness ug industrial products.
Dinhi sa Davao Region, dunay 30 ka mga MSMEs ang natabangan ug anaa pa sa 121 prototypes ang na-develop aron mahinayon pinaagi niining programaha.
Nahimo nang usa ka balaod ang Republic Act No. 11960 kon Act Institutionalizing the OTOP Philippines Program kaniadtong Agosto 2023 nga nagtumong sa pagpalagsik sa negosyo sa MSMEs human sa pandemya nga naglakip sa 90% sa tanang local businesses sa nasud.
via || Bombo LJF
