DAVAO CITY – Plastada na ang mga gihimong pagpangandam sa Department of Education 11 uban ang lokal nga panggamhanan sa Davao City alang sa pagahimoong Davao Regional Athletics Association kon DAVRAA Meet karong Abril 1 hangtod 7 dinhi sa Davao City.
Sa eklusibong pakighinabi sa Bombo Radyo Davao, gikanayon ni Jenilito Atillo, ang tigpamaba sa DEPED 11, nakahan-ay na ang tanang mga aspeto sa maong kalihukan partikular na ang playing venues, billeting quarters ug ang safety and security alang sa 11 sa mga schools division sa rehiyon nga gilangkuban sa Digos City, Davao City, Davao de Oro, Davao Occidental, Davao del Norte, Mati City, Davao Oriental, Panabo City, Tagum City, Samal Island, ug Davao del Sur Divisions ug anaa sa 300-500 ka mga delegado matag division.
Dugang pa ni Atillo, libre sab ang idalit nga tubig ug pagkaon alang sa mga musalmot sa Davao Meet. Samtang 12 ka mga iskwelahan sa Davao City ang mamahimong billeting quarters o tambayanan sa mga delegado.
Gipahimangnuan na sab ang ubang school divisions alang sa hugot nga implementasyon sa mga ordinansa sa dakbayan.
Sumala ni Atillo, walay kalisdanan ang nahimong pagpangandam alang sa DAVRAA karong tuiga gumikan sa tabang sa mga coordinating agencies ilawom sa Davao City LGU.
Sumala ni Atillo, angayng atangan sa mga Dabawenyo ang pinasahing pagpaugnat sa kusog ug panag-atbang sa mga pinakahawod nga mga atleta sa mga eskwelahan sa Davao Region nga pagahimoon sa daghanang mga iskwelahan sa dakbayan partikular na sa UP Mindanao gawas lamang sa swimming event nga ipahigayon sa Davao del Norte Sports Complex.
via || Bombo LJF
