DAVAO CITY – Gipaklaro sa Davao City Police Office nga dili “kidnapping” kon dili “abduction” ang nahitabo sa pagdagit sa two weeks old nga bata niadtong Pebrero 17.
Sumala ni DCPO spokesperson Police Captain Hazel Tuazon sa pakighinabi sa Bombo Radyo Davao, dili makonsidera nga kidnapping ang nahitabong pagbilin sa inahan sa bata ngadto na sa wa mailhing nagkuha nga babae sa may Centennial Park niadtong tungura.
Ulahi sab nakit-an ang maong bata sa may Bangkerohan ning dakbayan sa usa ka magtutudlo ug iyang kaubanan maong malampuson sab kining nataho ngadto sa San Pedro Police.
Giangkon sab sa pulisya nga nakuhaan sa CCTV ang hulagway sa maong nagkuha sa bata apan dili kini klaro ug hanap-hanap ang pagkakaplag niini.
Duna sab nakuhang ubay-ubay ka mga nakakita nga andam maghatag og pahayag atol sa identity sa maong suspetsado. Gisugdan na sab ang pagpangita sa nagkawat sa maong bata diin naghanyag ang San Pedro Police og P50,000 alang sa mga makatudlo sa gikahimutangan sa suspetsado.
Sa laing pamahayag, gipasalig ni Tuazon ang mga Dabawenyo ng luwas gihapon ang dakbayan bisan pa man sa nahimong pamahayag sa inahan sa bata nga “luwas ang bata, apan dili ang syudad.”
Matinahuron ang opisyal sa pagpaambit og pagsabot ngadto sa inahan gumikan sa frustration nga iyang nabatunan sa panahon nga nawala ang iyang anak.
Hangyo pa nga dili sawayon ang maong inahan nga nabiktima lamang sa makapabalakang kahimtang.
Gipasalig sab sa kapulisan nga nagpabilin ang police visibility sa daghanang bahin sa Davao City ilabi na sa panahon sa ilang pagpangandam sa ika-87 nga Araw ng Dabaw karong Marso.
