DAVAO CITY – Gikasubo sa lokal nga panggamhanan sa Davao de Oro ang pagsaka sa ihap sa mga na-retrieve nga patayng lawas sa nahitabong pagdahili sa yuta sa may Zone 1, Barangay Masara, Maco, Davao de Oro.
Base sa inisyal nga report gikan sa MDRRMO Maco, as of 7:00 PM, Pebrero 14, aduna nay natala nga 85 ka na-recover nga patayng lawas diin 79 niini tibuok lawas ug 6 niini sa nakuha parte nalang sa lawas.
Aduna usab 32 ka injured ang na rescue sa nahitabong landslide.
Sa kasamtangan, 38 kabuok ang atoang missing individuals. Samtang gilubong na kagahapon ang mga patayng lawas nga wa pa mailhan ug makuha sa mga tagtungod.
Anaa sa 9 ka mga wa mailhing patayng lawas ang dungan nga gipanglubong nga libre sa mass grave sa may Mawab Public Cemetery dungan sa pakig-alayon sa Maco LGU.
Gipasabot ni Maco Mayor Voltaire Rimando kinahanglang ilubong ang 15 ka mga patayng lawas gumikan sa pagkadugta niini. Gikatakda sab nga ilubong pagkaadlawng Biyernes ang lain pang mga unidentified nga mga patayng lawas nga kasamtangang pang gina-finalize ang datos niini gikan sa Management of the Dead and Missing Cluster sa Incident Command Post.
Giila ang siyam ka mga patayng lawas nga gilubong sa maong mass grave sa Mawab nga sila Nenimel Baganet, April Mae Baganet, Milioy Gecoso, Ronald Lorica Sr., Ronald Lorica Jr., John Rex Lorica, Edwin Canoy, Meroche Baring, ug Mica Jane Baring.
Sa pagkakaron adunay 6,356 ka mga indibidwal kon 1,637 ka mga pamilya ang nagpabilin sa 13 ka mga evacuation centers gumikan sa landslide sumala sa National Disaster Risk Reduction and Management Council.
