DAVAO CITY – Namahayag og pagkadismaya ang kanhi Pangulong Rodrigo Duterte ngadto kang Pangulong Bongbong Marcos ug sa iyang administrasyon human sa nahitabong paghitak sa peoples’ initiative for charter change sa ubang bahin sa nasud.
Atol sa nahitabong “One Nation, One Opposition” Prayer Rally sa may Rizal Park ning dakbayan kagabii, giakusahan sa kanhi pangulo ang mga Marcos nga gikatuoang nanguna sa maong inisyatiba nga bag-uhon ang konstitusyon.
Gisaway sab ni kanhi Pangulong Digong si PBBM nga “bangag.”
Gilaglag sab ni Citizen Digong ang pangulo nga sumala pa usa kini ka drug addict.
Gikanayon sa kanhi mayor nga una nang gipagawas kaniya sa PDEA ang mga ebidensya diin nahilakip dinhi si PBBM nga gituohang nalambigit sa ilegal nga droga. Apan sumala pa, wala kini gibutyag gumikan sa paghinagalaay sa duha ka partido.
Una nang giispekula ni Digong nga usa ka presidential candidate kaniadtong 2022 elections ang naggagamit og ilegal nga droga apan wala kini direktang gibutyag sa kanhi pangulo.
Nagbahad sab ang kanhi pangulo ngadto kang PBBM nga posibleng mag-atubang kini og susamang kapalaran sa iyang amahan nga si kanhi Pangulong Ferdinand Marcos Sr. nga napahawa sa katungdanan atol sa pag-ulbo sa martial law kaniadtong 1986.
Gikanayon sab sa kanhi pangulo nga nawad-an na kini og pagsalig sa mga anaa sa parlyamento nga nagpaluyo sa maong inisyatiba nga buot sab papanubagon sa kasong pagsuborno kon bribery.
Dugang pa kining naghangyo kang PBBM nga mutamod sa panawagan sa katawhan nga ihunong na ang pag-amedar sa konstitusyon aron dili masantop sa posibleng kadaot gumikan sa paglugway sa termino sa anaa sa katungdanan.
Gihagit sab ni Duterte ang mga kasundaluhan ug kapulisan nga panalipdan ang konstitusyon luyo sa mga alegasyon sa pag-amyenda niini.
Gihingusgan pa sa kanhi pangulo nga walay sayop sa kasamtangang konstitusyon ug kontra sab kini sa nagapahinabong cash-for-signature campaign sa mga barangay sa nasud.
Sa pikas bahin, nahimong halang ang mga pamulong nga gikanayon ni Davao City Mayor Sebastian Duterte ngadto kang Pangulong Bongbong Marcos atol sa gipahigayong paunang forum sa prayer rally against peoples’ initiative for charter change sa usa ka hotel ning dakbayan, kagahapon.
Pagsaway pa niini nga usa kini ka tapulay ug walay kaluoy nga pangulo. Hagit pa sa mayor nga muhawa kon mo-resign na lamang sa katungdanan kung wala kini pag-mahal sa nasud.
Gikanayon sa mayor ngadto sa katawhan atol sa nahitabong prayer rally kagabii nga nasakitan siya sa gihimong pagpasagad sa kasamtangang administrasyon ngadto kang kanhi Pangulong Rodrigo Duterte nga pagpakulong kaniya nunot sa gikatuohang pagsulod sa mga imbestigador sa International Criminal Court alang sa imbestigasyon sa duguong war on drugs sa milabayng administrasyon.
Gipahinumduman sab ni Mayor Baste si PBBM nga ang iyang amahan ang nagpalubong kang kanhi Pangulong Ferdinand Marcos Sr. sa Libingan ng mga Bayani nga gikatigan sa Korte Suprema niadtong 2016.
Gisaway sab sa kinamanghurang Duterte ang nahtabong pagbahin-bahin sa iyang partido ilawom sa iyang pagpangatundanan.
Namatikdan sab ang pagbalik sa kriminalidad sa nasud atol sa iyang paghulip isip pangulo human sa termino sa iyang amahan.
Gikasuko sab niya ang pakigbalik sa National Democratic Front alang sa paghibalik sa peace talks sa gobyerno.
Dungan sab niyang gisaway ang pagpasagad sa kasamtangang administrasyon nga nagapasamot sa kalisdanan sa matag Pilipino.
Kahinumduman nga nahimong malinawon ug nagmalampuson ang gipahigayong “One Nation, One Opposition” kagahapon nga gidagsa sa kapin singkwenta – mil ka Dabawenyo nga dungang nangampanya aron puhagon ug hunungon ang naghitak nga peoples’ initiative for charter change nga sumala pa gipundohan sa mga nangulo sa Kongreso.
