DAVAO CITY – Hugot nga gipaklaro sa Davao City LGU nga dili tinuod ang mga nanggawas nga post sa social media mahitungod sa gikatuohang pagsulod sa suspek sa pagpamomba sa Mindanao State University – Marawi niadtong Disyembre 3 sa buntag.
Naghangyo karon ang panggamhanan nga dili magpakatag sa sayop nga impormasyon nga posibleng maghatud og public hysteria.
Inay magpadala sa kahadlok, mamahimong batasanon ang Culture of Security pinaagi sa pakig-alayon sa mga ginapahigayon inspeksyon ug pagreport sa mga kadudaduhang butang, tawo o panghitabo sa palibot aron makunhuran ang risgo sa terorismo.
Hinuon, nagpadayag ang City Government nga under control na sa mga security forces ang kahimtang sa seguridad sa dakbayan.
Usa karon sa mga gipahigayon sa Task Force Davao ang pagpakusog sa seguridad sa mga places of worship sama sa simbahan ug mosque sa tibuok dakbayan.
Gipataas sab sa kapulisan ug kasundaluhan sa Davao City ang ilang pagpaniid sa palibot human sa nahitabong explosion atol sa santos nga Misa sa Marawi City.
Kahinumduman nga gipagawas ang hulagway sa duha ka mga persons of interest sa maong pagpamomba nga giilang sila Arsani Membisa ug Wahab Macabayo.
Gituohan karon sa gimugnang SITG nga retaliation o pagpanimalos ang hinungdan sa maong pagpamusikad human napatay sa mga military operations ang mga lider sa Daulah Islamiya-Maute Group.
via || Bombo LJF
