DAVAO CITY – Gipataas na sa National ug Regional Disaster Risk Reduction and Management Council ug Office of the Civil Defense 11 ang red alert status sa mga rehiyon sa Caraga ug Davao human mitay-og ang magnitude 7.4 nga linog sa Hinatuan, Surigao del Sur, niadtong Sabado sa gabii, Disyembre 2.
Sumala sa buhatan, baynte kwatro oras nga naka-standby ang mga personahe sa OCD aron maniid sa kalihukan sa napadayong pagtay-og ug pakipagkoornidar sa mga local government units alang sa pagahimoong relief operations.
Ning kasamtangan, nagpagawas og class suspension advisories ang mga LGU partikular na sa Davao de Oro diin suspendido ang tanang klase sa mga pampubliko ug pribadong tulunghaan sa Compostela, Laak, Maco, Mabini, Maragusan, Mawab, Monkayo, Montevista, Nabunturan, New Bataan ug Pantukan.
Suspendido sab ang mga klase sa tanang lebel sa Davao Oriental partikular na sa Baganga, Boston, Caraga, Cateel, Governor Generoso, Lupon, Manay, San Isidro ug Tarragona; samtang suspendido ang klase sa pampublikong basic education level sa Mati, Governor Generoso, ug Lupon.
Suspendido ang tanang klase sa mga pampublikong tulunghaan sa Davao City.
Sa Davao Occidental, walay klase ang tibuok probinsya sa tanang lebel karong adlawa.
Piling lugar lamang sa Davao del Norte ang dunay class suspensions karong adlawa sama sa Tagum City, IGACOS, Panabo City, Asuncion, Braulio E. Dujali, Carmen, Kapalong, New Corella, Santo Tomas, San Isidro ug Talaingod.
Sa Davao del Sur, dunay class suspension ang tamang elementary classes sa mga pampublikong tulunghaan sa Hagonoy, samtang walay klase sa tanang lebel sa Kiblawan ug Padada.
Ulahing nasinatian ang kusog nga aftershock kaganihang alas-3:49 sa kaadlawon nga dunay gikusgon nga magnitude 6.7 samtang naplagan ang episentro niini sa Cagwait, Surigao del Sur.
via || Bombo LJF
