DAVAO CITY – Malipayong gipaambit ni COMELEC 11 Assitant Regional Director Atty. Gay Enumerables nga sa kinatibuk-an, nahimong malampuson ang gipahgayon nga Barangay ug Sangguniang Kabataang Elections karong tuiga.
Matod pa sa opisyal, hapsay ang nahimong dagan sa BSKE gikan sa campaign period, paghatud sa mga voting paraphernalias, pagbotar sa mga katawhan sa barangay, hangtud sa pagproklama sa mga nakadaug sa piniliay.
Gipaambit sa opisyal nga 100% canvassed and proclaimed ang mga resulta sa eleksyon sa barangay ug usa ang Davao Region sa upat ka mga rehiyon sa Pilipinas nga walay natalang Election Related Incidents.
Nagpasalamat sab ang buhatan sa mga kaabag nga mga security agencies sama sa PNP ug AFP sa ilang gihatag nga suporta alang masiguro ang luwas nga eleksyon sa barangay.
Sa laing bahin, gihingusgan sa COMELEC Davao nga hangtud kagahapon na lamang, Nobyembre 29, ang pagsumitar sa mga Statement of Contribution and Expenditures sa mga nidagan nga mga kandidato atol sa BSKE 2023.
Hugot nga gibarugan sa COMELEC nga walay extension ang deadline sa ilahang SOCE.
Samtang kinahanglan sab nga anaa sa singko pesos matag botante ang nagasto sa usa ka kandidato, daog man o pilde.
Kon mulapas kini sa maong kantidad, posibleng mapahamtangan kini og kasong overspending nga usa ka administrative offense.
Gipahimangnuan pag-usab ang mga kandidato nga posibleng dili makalingkod sa katungdanan ang mga bag-ong halal nga opisyal nga wala pa makasumitar sa ilang SOCE.
Ingon man, mapasakahan og kasong administratibo nga nakalatid sa Omnibus Election Code.
via || Bombo LJF
