DAVAO CITY – Nagpahigayon og lihok protesta ang pipila ka mga progresibong grupo agig paghinumdom sa ika-51 nga katuigan sa pagdeklara sa Martial Law kagahapon sa may Freedom Park, Roxas Avenue ning dakbayan.
Mukabat sa lapas 50 ka tawo ang nagtapok-tapok gikan sa mga managlahing grupo ang nagkatigom aron ipanawagan ang kasamtangang suliran nga dili mahilayo sa kaagi sa mga nabiktima sa Batas Militar.
Pipila sa mga giprotesta sa mga grupo mao ang inhustisya, pagpanubag ug ang mga wala naresolba nga mga human rights issues ilawom sa diktaturya ni kanhi Pangulong Ferdinand Marcos, Sr.
Nagbutang usab ang grupo og Wall of Remembrance asa nakapilit ang hulagway sa mga inbididwal nga nahimong biktima sa Martial Law.
Lakip na sab nga gipanawagan ang pagbasura sa Anti-Terrorism Act of 2020 o mas nailang Anti-Terror Law, ang kontrobersyal nga confidential funds ni Vice President ug Education Secretary Sara Duterte, ang historical revisionism ilawom sa direktiba sa Department of Education nga kambyuon ang diktaturyang Marcos sa bag-ong curriculum, ug ang nagpahinabong kalisdanan sa mga Pilipino ilawom sa pagpangatundanan ni Pangulong Bongbong Marcos.
Sumala ni Anakbayan Southern Mindanao Region Spokesperson Beverly Gofredo nga usa sa gipanawagan sa maong kalihukan ang manawagan alang sa hustisya sa mga biktima sa Martial Law.
Kung kahinumduman nga mikabat sa kapin onse mil ang mga nahimong biktima diin nahilabtan ang ilang tawhanong katungod pinaagi sa mga nasinatian niini na pagpanamastamas panahon sa batas militar.
Nag-awhag sab ang maong panagtapok ngadto sa mga kabatan-onan nga dili kalimtan ang mangitngit nga kasaysayan sa atong nasod.
Atol sa maong lihok protesta, walay natalang untoward incidents ug malinawon sab kining gilusad.
