Patay ang kapin 40 ka pilot whale human ma-stranded sa usa ka baybayon sa New Zealand niadtong Huwebes.
Nakit-an ang pundok sa mga pilot whale sa baybayon sa Ngawi, duol sa Cape Palliser sa North Island, New Zealand, sumala sa pahayag sa Department of Conservation (DOC) sa nasod.
Sa inisyal nga taho sa Project Jonah New Zealand, usa ka organisasyon nga nagpanalipod sa kinaiyahan, kapin 20 ka balyena ang unang na-stranded sa baybayon, diin upat niini ang buhi pa.
Dugang pa sa organisasyon, nakig-alayon na kini sa mga ahensya sa gobyerno sa New Zealand, lakip ang lokal nga tribo sa Māori, alang sa pagluwas sa mga balyenang buhi pa ug pagsusi sa ilang kahimtang sa panglawas.
Apan niadtong Biyernes, nakit-an sa DOC ang 43 ka patay nga balyena sa usa ka kilometro nga bahin sa baybayon, gikan sa Ngawi hangtod sa Mangatoetoe.
Matod sa DOC, kasagarang ma-stranded sa baybayon ang maong klase sa balyena, apan wala pa matino ang tinuod nga hinungdan sa maong panghitabo.
